轉眼間，晞晞已四個月大了！

時間真的是過得很快，轉眼間晞晞已經四個月大了！由初時只識瞓喊和飲奶的細B，到現在還識得笑玩和翻身的大B，真係長大了許多。再過一段日子，大B又會識爬和走，又會識講說話，還會同哥哥爭玩具玩，不知介時會唔會變成另一位扭計的皓皓呢? 想到這裡真係開始有點兒擔心呢 ... ^_^!

解畫

皓皓所畫的畫，真係十分抽像，例如畫一條線代表地鐵、大圓代表隧道、有多細圓代表波波、點點代表英文字 ... 等。雖然同實物差好遠好遠，但起碼佢肯動手憑自己想像來畫，算是好的開始了！

皓皓最喜愛的玩具

皓皓係一個地鐵迷，平時喜愛睇地鐵，而玩具當然亦唔少得地鐵啦！每次見佢玩都十分投入，還會模仿地鐵行駛時發出的聲音：「轟隆轟隆！轟隆轟隆！」。當佢認真玩時，係可以玩足一個鐘都唔會厭的 ....

兩兄弟

最近皓皓的表現真係差多乖少，但佢對細佬的態度卻沒有變。細佬喊時，佢會走埋去安慰細佬：「唔好喊啦」；當我們抱住細佬時，佢會走過來摸下細佬塊面仔；細佬換片，佢又會幫手攞尿片和濕紙巾 … 等等。希望日後佢哋長大後，不會因時間影響佢哋之間的兄弟情，互相照顧對方。

皓皓在校的表現 …

開了學三日，總結皓皓上堂的表現可以話係不合格，仍然是怕醜地坐著，目光呆滯，沒有跟老師一起唱歌玩樂，完全唔投入於學校生活中。這種情況我是意想不到的，因為較早前參加playgroup，皓皓都不會這樣子的，我還以為來到正式開學皓皓會好輕鬆地應適課堂的生活。見到皓皓在校的表現，我好擔心佢會否無法融入校園生活、無法結識朋友仔、甚至討厭返學 ... 

跟皓皓一起畫畫

老婆買了一盒 washable marker 給皓皓畫畫，容易清洗，用濕布一抺就得，這樣就不用怕皓皓週圍畫。回到家後，我們便跟皓皓一起在衣櫃門上畫畫，有我們一家四口全家福，又有皓皓喜歡的地鐵和生果，畫得好開心！！

開學啦！

今日係皓皓第一次著校服返學，雖然只係返十五分鐘，但我心情都有點緊張。一來怕佢瞓唔夠罵情緒，二來又怕佢唔肯著對黑色皮鞋返學。最終都無出現以上問題，但反而唔肯著校服 … >_<，真係萬萬都估唔到。之前試著時，佢都好開心，但今日竟然唔肯著！！於是我唯有試下同皓皓講句例牌的說話：「返學一定要著校服，如果唔係老師唔比上堂的。」講了兩次再加少少強迫，最終都肯著校服上身，順利離開屋企返學去。

可能皓皓太耐無踏足校園的關係，當踏入學校門口，見到老師們便怕醜地走到我身後，唔敢向老師們講早晨。入到班房，有好多老師、家長、同學仔都在房室內，我留意到皓皓初時都有點怕，但揾到自己的座位坐低後，慢慢地適應過來就開始把玩剛取的課本，真係同我一樣慢熱的性格。

十五分鐘好快過去，基本上都算順利，無好似其他小朋友大吵大鬧，希望未來返學日子都這樣就好了！

我的新相機

上年賣了 Samsung NX10 換來 NX300，雖然畫質比 NX10 好，但缺少了 EVF 在拍照時好像少了一點靈活性和一份專業感，忘記了當初買機時的要求 - 細、易操控、有 EVF。因此，今年再度入手了這一部 Olympus e-m5，半轉會到 m43，可調設定比 Samsung 機多，已入 12-40mm 2.8 pro 及 25mm 1.8，希望日後再入閃燈和 40-150mm 2.8 pro … (^O^)

扭計的皓皓

皓皓已經兩歲八個月了，但見佢近日成日扭計，又唔願主動試新事物，自理能力又差，真怕佢大過後會不成大器。希望日後返學之後，在老師的教導下會有改善。

重返 Blogger

最近睇了一遍文章關於攝影愛好者應有寫網誌的習慣，才醒覺我已多年來未寫過網誌了。重睇返以前寫下的網誌，好像回到過去似的，回味到當時一刻的感受和心聲，亦都重燃我寫網誌的興趣。

從今日起，我又開始寫 blog LA ...

晞晞學始翻身了！

晞晞由昨日開始識得翻半身（左側身），今早起身見到佢瞓覺的姿勢已由平瞓轉為打側瞓，還要瞓到好舒服的樣子呢！